पदका लागि राजनीतिक दलमा खिचातानी बढ्दो छ, जुन राजनीतिमा बढिरहेको विकृतिको उदाहरण हो । चुनाव जित्न र पदका लागि पुराना राजनीतिक दलका नेताहरु जस्तोसुकै कार्य गर्न पनि तयार हुनुहुन्छ । त्यस्तो फोहरी राजनीतिको हिस्सेदार बन्न म सकिनँ । राजनीतिमा देखिएको चरम बिकृतिले देश विकासतर्फ होइन विनासतर्फ धकेलिरहेको छ । फलस्वरुम जनतामा चरम निरासा बढिरहेको छ । देशको अस्तित्व नै गुम्ने खतरा बढिरहेको छ । यस्तो अवस्था हामी युवाहरुले देशलाई सहि दिशामा मार्गनिर्देश गर्न जरुरी छ । जसका लागि हामी राजनीतिमा होमिनुपर्ने बाध्यता आइपरेको छ । सोही कारण मैले कास्की २ ‘ख’बाट प्रदेश सभा सदस्यमा स्वतन्त्र उम्मेदवारी दिएकी हुँ । लालटिन चुनाव चिन्ह मैले प्राप्त गरेकी छु ।

मैले अहिलेको चुनावमा महिला र युवा वर्गलाई अग्रस्थानमा राखेर उहाँहरुको मन र मत जित्ने विश्वास गरेको छु । जब म एउटा मिसन र भिजनसहित स्वतन्त्र रुपमा उम्मेदवार बनेँ त्यसपछि धेरै महिला तथा युवाहरुबाट मलाई समर्थन र प्रोत्साहन मिलिरहेको छु । उहाँहरुबाट प्राप्त साथ र सहयोगले मेरो मनोवल उच्च बनाएको छ र म उत्साही पनि छु ।

म पेशाले शैक्षिक क्षेत्र र धेरै सामाजिक संघसंस्थामा आबद्ध छु । तर, एउटा समृद्ध नेपालको सपना साकार पार्नका लागि सक्षम युवाहरु राजनीतिमा आबद्ध हुन आवश्यक छ । सोही आवश्यकतालाई मध्यनजर गर्दै मैले पनि स्वतन्त्र उम्मेदवारी दिदै राजनीतिमा होमिएकी हुँ । युवाहरुलाई दलहरुले प्रयोग मात्रै गरे तर अबसर दिइएन । अब युवाहरु दलका नेताहरुको भर्याङ मात्रै नबनि राजनीतिक नेतृत्वमा लिएर अगाडि बढ्नुपर्छ ।

समृद्ध प्रदेश निर्माण गर्ने, महिला हिंसालाई शून्य बनाउने, महिला र युवालाई उद्यममा प्रोत्साहन गरी लगानीमैत्री वातावरण निर्माण गर्ने, पर्यटनको विकास, महिला सशक्तीकरण गर्ने, लैंगिक समानता कायम गर्ने, पीछडिएका वर्गको उत्थान गर्ने मेरो प्रतिबद्धता छ । सुरक्षित प्रदेश बनाउने अभियानमा म लाग्नेछु ।